*KETOSILMÄRUOHO*

*KETOSILMÄRUOHO*
Syksyn 'Viiminen-Silimän-Ruoka' kostiasa aamu-heinikosa.

Siittä'hän mie sen aamusela 'ponkasin' - tahtoo sanua - huomasin...!
Eihän siinä lyhyesä aamu-kastheisesa ruohikosa - tai eihän se mikhään ruohikkokhaan ole - semmonen vähän vihirijjää jotaki - mitä'se lieneekhään kasvava 'polun-pohoja' - muuta huomattavvaa ookhaan...!
Eikä sitä tuota 'Silimä-Ruohuakhaan' huono silimänen huomaakhaan muutenko, että siinä on jotaki väriäki - tuomosta valakosta ja vaalian-violettia vilahtaa silimä-kulumasa...!
Pienihän son, tuskin 'tulitikun' korkunen.
Koko kesän son siinä runshaana essiintyny koko 'suvun' kansa...

Noh...joo.. ko' päästhiin tästä uluko-muo'on esittelystä varsinaisheen asih'haan, eli misthään son tuon nimen napannu...? 'Keto'-'Silimä-Ruoho' - tuon ensin olevan 'keon' jokhainen jollaki laila päättelemälä yhistää ruohikhoon tai vastaahvaan.
Tuon 'silimän' son ilimeisesti saanu siittä ko' jokku - enhän mie tiiä - sanovat että son aikoihnaan ollu - ja mihinkäpä se siittä olis muuttunu - jonkinlainen *rohtos-kasvi*. Sillä on hoiettu erilaisia silimä vaivoja. Nuhhaan ja varsinki 'heinä-nuhhaan', erilaishiin tulehhukshiin ja katarreijhin son hyäki rohto. Koska nämä on kuulo puhheita, emmie tiiä näilä entisen jonkin-astheisen valokuvvajan tioila ja taijjoila voi niistä mennä minkhään laisheen takkuusheen. On parempi turvautua 'oikian lääkheitten tuntijan' aphuun jos eppäilee eelä olevia saihrauksia potevansa.
Appi-Ukko kylläki suositteli 'kanerva-vettä'. Soli semmonen 'nektari', että ko' sitä otti päivittäin sopivan 'tuijhauksen' ei semmosta tautia ollukhaan mihin sei'ois tehonnu.
Ite se sitä valamisti oman 'resehtin' mukhaan varhmaan kymmeniä vuosia.
Net'hän vanhojen ihimisten 'resehtit' näistä rohtos-kasveista ja niien käytöstä ois pitäny aikoihnaan panna 'ylös' johonki - vaikka viimisen tupakki-askin kantheen - ko' tuo tupakin poltto'ki tuli aikoihnaan 'vanhan-aikaseksi'. Resehti tietenki vilimien kansa samhaan arkisthoon...!

http://picasaweb.google.com/eskoa514